"كلمة غريب"
ثاني يوم الجو غائم والبرد دخل للقاعة رغم الشبابيك المقفولة كالعادة گعدت بالكرسي الأخير أحاول أذوب بين الصفوف
بعد المحاضرة ضاع قلمي بين الكتب گمت أدور عليه بسرعة رفعت راسي وشفت شاب يمد إيده:
هذا قلمچ؟
رفعت عيني بسرعة عيون عادية بس بيها شي مختلف يمكن وضوح يمكن صدق أخذت القلم وگلتله:
إي شكراً
ابتسم ابتسامة بسيطة وگالي:
تعرفين؟ مرات قلم صغير يضيع يخلينا ننتبه لاشياء أكبر يمكن مو كل شي ضاع فعلاً ضاع
سكت وراح
تركني بكلمة غريبة كلش كلمة ما توقعتها من شخص ما يعرفني
رجعت للبيت بس الجملة بقت تطن براسي:
"مو كل شي ضاع فعلاً ضاع"
فتحت دفتري وكتبت:
"يمكن أكون ضايعة بس يمكن بعدني موجودة يمكن اللي أفكره فراغ هو بداية الطريق"
ولأول مرة حسّيت إن يومي مختلف مو لأن شي كبير صار بس لأن كلمة واحدة من غريب فتحت نافذة صغيرة داخلي.